Zuid-Beveland

11. En ie zei: Di was ter êên die à twi zeunen.

12. Den jôngsten van ulder zei tehen z'n vaoder: Vaoder heef mien possie van ôônze riekdom, wi à ik recht op è.. En ie verdêêl'n t ônder ulder.

13. En 'n paer daehen laeter maekte de jôngste zeune d'r aellemille helt van, en ie hing opreize ni 'n var land, wêêr àt 'n z'n riekdom verjanboezeloerde mêê 'n leven van overdaet.

14. Toen à ie d'r aelles deur elapt à, kwaem ter 'n zwaeren oenersnôôt over dat land en ie behon hebrek te lien.

15. En ie trok ter op uut en ie drong z'n eihen op bie êên van die hrôôte lui van dat land en ie stierde um wig ni 't land om z'n vèrkens te voeren.

16. En ie wou z'n buuk vull'n mie de schell'n, die à de vèrkens fraten, mè hin mêns haf um ze.

17. Toen kwam um toet z'n eihen en zei: Ouvee èrrebeiers van m'n vaoder èn brôôd zàtters en ik komme ier om van den oenger.

18. Ik za opstaen en gaen ni m'n vaoder toe en tehen z'n zehhen: Vaoder 'k è ezondugt tehen den emel en voe joe.

19. Ik bin nie mi waerd om je zeune te êêten, lit mien mè wezen as êên van joe errebeiers.

20. En ie stoeng op en hieng trug ni z'n vaoder. En toena um nog un ênde wig was, zag z'n vaoder um, wier t'n mi deernisse vervult. En ie liep um tehen, viel ten om z'n als en koste um.

21. En de zeune zei tehen um: Vaoder, 'k è ezondigt tehen den emel en voe joe, 'k bin nie mi waert joe zeune te êêten.

22. Mè de vaoder zei tehen z'n slaoven: Brieng hau 't beste klêêd ier, en trok 't bie um an, en doet um 'n rink an z'n and en schoenen an z'n voeten.

23. En êêl 't vet èmeste kalf en slagt et, en laet'n ôôns 'n fêêstmael ène.

24. Wan m'n zeune ier was dôôd en is wee levent eworren, ie was verloren en ie is evonnen. En ze behonnen fêêst te vieren.

25. Z'n ouwste zeune was op 't land en toen ie flak bie uus kwam, ôôrde ie meziek en dansen.

26. En ie riep êên van de knegs en vroeg wat ter te doen was.

27. Die zei tehen um: joe broer is ekommen en joe vaoder ei 't vet emeste kalf laeten slaggen, daerom a um, um wee hezond trug eit.

28. Mè ie wier kwaêt en wou ter nie in haen. Toen kwam z'n vaoder ni buuten en ie drong bie um an.

29. Mè ie antwoordde en zei tehen z'n vaoder: Kiek, a zôvêê jaeren bin ik a bie joe om te wèrken en ik è aoltied edaen dat à jie wou, mè mien ei jie nog nôôit 'n boksje eheven om mie m'n kammeraas te fêêsen.

30. Mè noe a die zeune van joe ekommen is, die a aelles opemikt eit mi oeren, ei jie voe um 't beste bêêsje laeten slaggen.

31. Mè ie zei tehen um: M'n jôôn, jie bin aoltied bie mien en aol 't miene is 't joeë.

32. Oôns zouen motten fêêsen en blieë wezen, wan jou broer ier was dôôd en ie leef wee, ie was verloren en is evonnen.